publicaziun

Tschertgà vegn in nov toc da teater rumantsch. Tut las furmas scenicas, performativas e dramaticas e tut ils idioms e rumantsch grischun èn bainvis. L’emprima represchentaziun dal toc vegn dada durant il «festival travers zuoz» l’atun 2025 en il Zuoz Globe d’in ensemble da teater professiunal (la data exacta vegn anc communitgada).

• Sviluppai Vossa idea e la tramettai fin mesemna, ils 15 da matg 2024 a las 24:00 en furma anonimisada:concept dal toc da teater incl. ina skizza da l’ulteriur svilup (max. duas paginas A4 / instrucziuns da reschia n’èn betg necessarias)
• extract dal text (trais fin max. tschintg paginas A4 / 6’000 – 10’000 segns incl. spazis vids)

• Il text inoltrà sto esser scrit exnum per rumantsch. Tut tenor cumposiziun da l’ensemble sto il text però permetter midadas da l’idiom.
• Il toc dastga esser concepì per max. set performr:as / actur:as / musicist:as / sautunz:as.
• Il toc duai avair ina lunghezza d’almain 60 minutas, ma betg surpassar 90 minutas.
• Il text po vegnir scrit d’ina persuna u d’ina squadra. Ina squadra sa cumpona p.ex. d’autur:as betg rumantsch:as en collavuraziun cun autur:as rumantsch:as.

Ils texts vegnan preschentads a la giuria en furma anonimisada. La giuria per l’onn 2024 sa cumpona da las persunas suandantas:

• Selina Beghetto (dramaturga e scienziada dal teater)
• Manfred Ferrari (reschissur, manader artistic Ressort K)
• Fadrina Hofmann (schurnalista)
• Rico Valär (scienzià da la litteratura ed intermediatur da cultura)
• Roman Weishaupt (directur dal Teater Cuira)