premiad:as
Il premi travers zuoz è vegnì surdà per la segunda giada. Mintga dus onns vegn la glista prolungada per in num.
2026
Viola Cadruvi: Contas gadas
Viola Cadruvi n’è betg in num nunenconuschent en la scena litterara rumantscha. La scienziada litterara, scolasta, columnista e mamma da duas figlias scriva per rumantsch e per tudestg. Ses emprim cudesch «La figlia dal fraissen» è cumparì 2020 tar la Chasa Editura Rumantscha. In onn pli tard è ses roman «Panuglias da fim» cumparì tar Ediziun Apart. 2023 ha ella promovì a l’Universitad da Turitg cun ina dissertaziun sur da la femininitad en la litteratura contemporana rumantscha. En il mument lavura ella sco autura e textadra per il studio dad animaziun e disign Studio Toc.
2024
Asa Hendry: Bab, siu archiv ed jeu
Asa Hendry (*1999 en Val Lumnezia) è autur*a e lavura en il spazi tranter litteratura, teater e performanza. Hendry è creschì* si en il Grischun, ha studegià scienza da teater e da gender studies a Berna ed ha fatg il bachelor da scienza da teater applitgada a Giessen (DE). Per la lavur litterara è Hendry vegnì undrà* pliras giadas cun il «Premi Term Bel». L’onn 2018 ha Hendry retschet il Premi litterar grischun per il roman Sin lautget (Chasa Editura Rumantscha). Oz viva e lavura Hendry puspè en il Grischun.
2022
Selma Mahlknecht: Üna sbrinzla – üna grotesca otalpina
Selma Mahlknecht è oriunda dal Vnuost ed ha studegià suenter la scola media dramaturgia e scenari a Vienna. Ella ha scrit plirs cudeschs e tocs da teater per giuvenils, ma era per ensembles professiunals per tudestg. Dapi diesch onns viva ella a Zernez, nua ch’ella ha er emprendì rumantsch. Ella lavura sco autura independenta e preschenta regularmain avant Nadal in program d’art per la tribuna pitschna. «Üna sbrinzla – üna grotesca otalpina» è ses emprim toc da teater rumantsch.
