idea
Cun la finamira da promover il teater rumantsch han las trais instituziuns fundaturas – la vischnanca da Zuoz, il Lyceum Alpinum Zuoz e la Lia Rumantscha – creà da cuminanza l’onn 2022 il premi da teater premi travers zuoz ed il festival da teater festival travers zuoz.
Lucian Schucan, suprastant uniun travers, Selma Mahlknecht, victura premi travers zuoz 2022, Gianna Olinda Cadonau e Rico Valär, suprastant:as uniun travers. © Mayk Wendt
Ivo Bärtsch, Rico Valär, suprastants uniun travers, Selma Mahlknecht victura premi travers zuoz 2022, Gianna Olinda Cadonau, suprastanta uniun travers. © Mayk Wendt
Per pudair realisar questas activitads han ellas fundà l’uniun travers. Ellas èn represchentadas en la suprastanza cun mintgamai ina persuna. La suprastanza publitgescha il premi e realisescha sia surdada ed organisescha l’onn sequent il festival cun la producziun dal teater premià.
Cun l’emprim document scrit per rumantsch, la poesia «Chianzun dalla guerra dagl Chiastè da Müs» or da la plima dal Zuozingher Gian Travers (1483–1563), dat Zuoz in dachasa cultural ed il num a la nova purschida. Il Zuoz Globe/Lyceum Alpinum Zuoz porscha cun l’infrastructura dal teater la tribuna ideala per l’intent.
Cun ses engaschament en l’uniun travers promova la Lia Rumantscha la producziun da texts da teater rumantschs e la lavur da teater contemporana. Il teater ha ina lunga tradiziun en il Grischun. Sias ragischs ha el tranter auter er en il teater popular che la Lia Rumantscha ha promovì da bell’entschatta. Il teater è l’intermediatur d’ina lingua ed uschia ina pitga impurtanta da la promoziun dal rumantsch.
Sustegnai l’uniun e daventai commembr:a passiv:a!