07-10-23
10:00
08-10-23
10:00
Lavuratori da scriver cun Felix Benesch
07.10.23
10:00
08.10.23
10:00
As interessescha il scriver scenic? Reservai in plaz per il lavuratori cun Felix Benesch durant il festival travers zuoz.
Il lavuratori da dus dis dat invista en l’art dal scriver scenic. Il scenarist, autur da tocs da teater e reschissur renumà Felix Benesch vesa sasez surtut sco praticher. Per autur:as interessad:as avra el sia chascha d’utensils, parta sias experientschas, dat cussegls e tradescha in u l’auter tric co ch’ins po vegnir a frida cun las sfidas ch’ins inscuntra durant scriver texts scenics. Il lavuratori sa drizza ad autur:as che s’interesseschan da nov u puspè per il scriver scenic.
Il lavuratori ha lieu
sonda, ils 7 d’october, 10–13
dumengia, ils 8 d’october, 10–13
Annunzia
Vus pudais As annunziar cun ina curta descripziun da Vossa persuna per tudestg u rumantsch che Vus tramettais ad info@uniun-travers.ch. Il curs vegn salvà per tudestg, il dumber da plazs è limità. Il lavuratori custa CHF 150. Il pretsch includa dus pass dal di per il festival travers zuoz per la sonda e la dumengia, alloschi e dunsena è chaussa dal:las participant:as.
Dapli davart Felix Benesch
Felix Benesch è creschì si a San Murezzan e Cuira, nua ch’el ha suenter il seminari da scolasts fatg emprovas sco schurnalist e lavurà en differentas funcziuns al teater. Suenter varsaquants onns sco assistent da reschia al Burgtheater a Vienna è el stà reschissur al Schauspielhaus a Turitg. Dapi il 2000 scriva el scenaris per films lungs, crimis e serias per incumbensa da differents emetturs da televisiun en Germania ed en Svizra, ma era per il kino ed il teater. El enconuscha il mastergn dal raquintar or dals pli divers connexs, da l’uschenumnada cultura elevada sur il «Tatort» e la seria d’acziun fin a la soap quotidiana producida a moda industriala. Er en il Grischun pon ins adina puspè ir a guardar tocs dad el, sco davos «Comander – Glauben. Wissen. Macht.» a chaschun dal giubileum da la refurmaziun a Cuira, ubain il musical «Hotel Victoria» che ha rendì omagi a Vico Torriani. Felix Benesch viva oz cun sia famiglia a Lipsia/Leipzig ed a Seewis Vitg.