06-10-23
19:00
07-10-23
17:00
08-10-23
14:00
Üna sbrinzla – üna grotesca otalpina
06.10.23
19:00
07.10.23
17:00
08.10.23
14:00
Il scenari è enconuschent: in vitg muntagnard idillic è smanatschà da depopulaziun ed impovriment. Tut che sa lamenta, ma nagin che na fa insatge. Quai sa mida in bel di cura ch’in investur annunzia via sia agenta da vulair transfurmar il vitg en in paradis da vacanzas. Ina part dal:as abitant:as è fieu e flomma, autr:as – conservativ:as da princip – èn sceptic:as e sa dostan. Prest èsi a fin cun il ruaus en il vitg, i vegn construì tut a dubel. La politica e l’impressari fruschan ils mauns, baininqual scappa en las muntognas. Ma cun quai n’è l’istorgia anc betg terminada – ina vieuta imprevisa surprenda tut:tas.
Lingua(s)/idiom(s): puter, vallader, sursilvan, s-chüs-cherin
cun surtitels tudestgs
Auturas: Selma Mahlknecht en collavuraziun cun Ulrica Guidon
Reschia: René Schnoz
Acturas ed acturs: Felicitas Heyerick, Marietta Jemmi, Jonathan Ferrari, René Schnoz, Annina Sedlacek
Cumposiziuns, arranschaments, sounds, grooves e schuschuris: Rolf Caflisch
Cun excepziun da Chara Bella Engiadina: Nina Mayer, Mi’Amia
Registraziuns: Lou Zarra, Audio Loft Chur
Tribuna: René Schnoz
Costums: Briony Langmead
Glisch: Ivo Bärtsch
Assistenza da reschia: Ronja Muoth
Ospitanza: Jessica Willy, Aita Bazell Cadonau
Producziun: uniun travers, Ivo Bärtsch, Gianna O. Cadonau, Romana Walther
Coproducziun: Zuoz Globe/Lyceum Alpinum Zuoz
Persunas participadas
Selma Mahlknecht
Selma Mahlknecht è oriunda dal Vnuost ed ha studegià suenter la scola media dramaturgia e scenari a Vienna. Ella ha scrit plirs cudeschs e tocs da teater per giuvenils, ma era per ensembles professiunals per tudestg. Dapi diesch onns viva ella a Zernez, nua ch’ella ha er emprendì rumantsch. Selma Mahlknecht lavura a l’Academia Engiadina Samedan, instruescha creschids e scriva. «Üna sbrinzla – üna grotesca otalpina» è ses emprim toc da teater rumantsch.
René Schnoz
René Schnoz è naschì il 1966 e creschì si a Mustér. Suenter la scolaziun d’actur a la Schauspiel Akademie Zürich (oz ZHdK) è el stà commember da l’ensemble al Theater Basel tar Frank Baumbauer, al Theater Oberhausen tar Klaus Weise ed al Theater Neumarkt, Turitg, tar Wolfgang Reiter. Tranteren e dapi il 2010 lavura el independentamain, adina pli savens era sco reschissur. El ha inscenà operas, gieus sut tschiel avert e teaters cun giuvenils, laics e profis. Cura ch’el na fa betg teater, va el cun ses apparat da fotografar enturn il mund e mussa ses maletgs en exposiziuns. Ina selecziun da lavurs da reschia: Die Dunkelheit in den Bergen, Macbeth, Der Revisor, Der Schwarze Tod, Die Niere, Was ihr wollt ed ulteriuras var 50 inscenaziuns.
Lavuratoris da teater, moderaziuns, gieus auditivs e rollas en la televisiun ed en films (Schellenursli’ Tatort, Heidi, Kassensturz’ Lüthi und Blanc, Metta da fein, Amur senza fin, Neumatt, Frieden ed auters) èn ulteriurs da ses genres.
Premis e renconuschientschas:
Premi Emil Oprecht, nominaziun sco il meglier actur giuven dal Rain dal Nord-Vestfalia e sco ‹Best actor per Metta da fein› al festival da film da Hessen, Premi da cultura dal Club alpin svizzer, Premi da promoziun e Premi da renconuschientscha dal chantun Grischun, Premi da renconuschientscha per lavur culturala da la citad da Cuira.
Rolf Caflisch
Rolf Caflisch (*1978, Cuira/Trin) iniziescha, creescha raits, intermediescha ed organisescha. El lavura en divers contexts musicals ed artistics – live, sin e davos la tribuna, en il studio, a differents festivals, per Radio SRF e per producziuns da teater. Il 2008 ha el fundà la retscha da concerts WEEKLY Jazz. Il 2019 ha el inizià ed organisà la reuniun da la scena da jazz da Cuira. Il resultat è l’uniun JazzChur. El è commember da suprastanza da l’uniun Graubünden Musik, copresident dal Kulturraumnetzwerk Chur e president directiv da JazzChur.
Per ses engaschi cultural durant plirs onns è Caflisch vegnì undrà il 2014 cun il Premi da renconuschientscha da la citad da Cuira. Il 2016 ha el survegnì in stipendi da trais mais a la Cité internationale des Arts a Paris. Il 2017 ha el retschavì dal chantun Grischun ina contribuziun ad in project grond.
Il mument lavura Rolf Caflisch vi dad in program da solo, è commember da la band da punkrock Elite Partner, dal collectiv d’improvisaziun Schnoz’s Darkbeat e dal trio da jazz Diallo Sprenger Caflisch. El è manader musical da la Late Lounge Band da Radiotelevisiun Svizra Rumantscha e musicist en il rom da las producziuns da teater wenn hai kusch, Piz Palü ed Üna sbrinzla – üna grotesca otalpina.
Felicitas Heyerick
Felicitas Heyerick, naschida en il Grischun, ha fatg la matura al gimnasi Claustra Mustér, ha studegià art dramatic a la European Film Actors School a Turitg ed al Lee Strasberg Theatre & Film Institute a Los Angeles. Ella ha gudagnà la concurrenza per lavur culturala professiunala e retschavì il Premi da promoziun dal chantun Grischun ed il Premi da renconuschientscha da la citad da Cuira per sia activitad artistica. Per sia interpretaziun excellenta dal Mephisto en il Faust da Goethe als Gandersheimer Domfestspiele 2021 è ella vegnida undrada cun il Roswitha-Ring. Ultra da sia lavur briglianta sin tribuna dramatisescha ella temas litterars, maina reschia, lavura per il film e la televisiun ed intermediescha sia savida e sias cumpetenzas a chaschun da lavuratoris e seminaris (t.a. ZHDK, SRF).
Marietta Jemmi
Marietta Jemmi è naschida e creschida si a Flem ed ha absolvì la scolaziun da magistra primara a Samedan e Cuira. Perquai èn tant il sursilvan sco er il vallader ses dachasa linguistic. Scolaziun d’actura a Turitg e Berlin. Ella viva sco actura e pledadra a Turitg. Collavuraziun en diversas producziuns filmicas: Göttliche Ordnung (reschia: Petra Volpe), Amur senza fin (reschia: Christoph Schaub), Metta da fein (Carlo Beer, Urs Berlinger), Tatort (reschia: Tobias Ineichen). Commembra dal Duo Liebestoll cun Nathan Schocher.
Jonathan Ferrari
Jonathan «Johnny» Ferrari è naschì ils 24-05-1999 a Locarno e creschì si a Samedan. Cun 14 onns ha el scuvert sia passiun per il teater durant la producziun König im Schnee da Giovanni Netzer, ina passiun ch’el ha vivì suenter en la English Theatre Company dal Lyceum Alpinum Zuoz. Dapi il 2019 studegia el art dramatic a la Scola dals arts a Berna, nua ch’el ha participà il 2022 a l’audiziun d’absolventas e d’absolvents. Ultra da numerusas atgnas producziuns e producziuns da scola è el stà activ surtut al Teater Son Gagl, tranter auter en la producziun Die kleine Hexe da Barbara-David Brüesch ed en il toc mobil per uffants Lahme Ente, blindes Huhn da Christian Hettkamp.
Annina Sedlacek
Annina Sedlacek (*1980) ha fatg il diplom a l’Accademia Teatro Dimitri l’onn 2004. Ella è actura, reschissura, pledadra e coacha per films. Ultra da quai intermediescha ella dapi onns sia savida sco docenta per communicaziun nunverbala e cumpetenza scenica. Ella lavura cun pliras gruppas da teater ed ha fundà il 2015 ANIKO, sia atgna cumpagnia teatrala.
Briony Langmead
Briony Langmead è costumista independenta dal Reginavel Unì. Ella ha frequentà il Bournemouth Arts Institute e terminà la scolaziun il 2006 cun in Bachelor of Arts en costum per taila e tribuna. Dapi lura ha ella partì sia creativitad e savida davart costums istorics cun bleras squadras plain fantasia e dinamica. Briony è stada engaschada tranter auter per films lungs sco Harry Potter e Robin Hood, ha realisà pliras incumbensas televisivas per la BBC, fatg il styling per reclamas e videos da musica ed accumpagnà campagnas da Coca-Cola e Becks. Ultra da quai ha ella lavurà per la Royal Shakespeare Company, il Royal National Theatre e l’Auckland Theatre Company en Nova Zelanda.
Avant che vegnir en Svizra ha ella vivì a Whistler, Canada, nua ch’ella è stada responsabla per la cumpra e l’assegnaziun da products en l’industria da vestgadira outdoor. Dapi il 2019 viva ella cun sia famiglia en l’Engiadina ed ha dapi lura contribuì sco costumista a pliras producziuns dal Zuoz Globe.
