Las secretezzas da Susanna – Opera Engiadina e La Camerata Pontresina

Riikka Läser ha asolvì sia scolaziun da saut a Turitg ed a la scola da ballet dal Ballet da Hamburg John Neumeier. Durant quest temp ha ella retschavì trais giadas ina suenter l’autra il stipendi da Migros. Dal 1998 fin il 2005 è ella stada engaschada sco solista tar il Tanztheater Nürnberg, nua ch’ella ha lavurà cun numerus:as coreograf:as e reschissur:as renumad:as al nivel internaziunal. Dapi il 2005 lavura ella sco sautunza e coreografa libra ed è gia stada giast tranter auter al Aldenburgh Music Festival, als Bregenzer Festspiele, a la Canadian Opera Company, al Bridging Arts Salzburg/Nürnberg sco er en la regiun, numnadamain a l’Origen Festival Cultural ed al Ressort K. Dapi plirs onns vegnan vitier pli e pli atgnas lavurs da reschia, p.ex. l’opera da Benjamin Britten Noahs Flut per il Bridging Arts Salzburg (undrada il 2016 cun il Salzburger Landespreis für kulturelle Bildung), la miniatura da saut Deux Femmes per l’Origen Festival Cultural u Bedford Suite per il Zuoz Globe. Il 2022 ha ella fundà ensemen cun Ivo Bärtsch sia atgna cumpagnia LÄSER & BÄRTSCH Tanz Theater ed ha preschentà il november 2022 cun BEASTS – Blue Hour at Macbeth’s l’emprima atgna producziun che ha survegnì grond laud da la critica e dal public.

Claudio Danuser è creschì si sco descendent d’ina famiglia da Puntraschigna en India, a Basilea ed a Berna. Grazia als nons ha el cultivà sia relaziun cun l’Engiadina. El ha studegià scienzas da musica e manader da chor / dirigent a l’Universitad ed al Conservatori da Berna e chantadur d’opera en Italia. La stagiun 1987/88 è el stà commember da l’Opernstudio da l’Opera da Turitg ed a partir da quel mument ha el fatg ina carriera internaziunala sco chantadur. En il Grischun è el stà preschent sco interpret da las rollas principalas da las duas operas rumantschas Il President da Valdei da Robert Grossmann (Scuntrada 1988 a Scuol) ed Il semiader da Gion Antoni Derungs (Teater da la citada da Cuira, 1996). Danuser è era stà commember da l’ensemble Ils Trais Baritons Grischuns. Il 2005 ha el fatg part sco solist da la producziun Lucrezia Borgia da l’Opera San Murezzan en il Badrutt’s Palace. Dapi ch’el ha surpiglià il 2002 la batgetta dal chor da concerts da Richterswil ed il 2003 quella da las Swissair Voices è el activ principalmain sco dirigent. Il 2013 ha el dirigì al Festival La Perla il chor che ha represchentà sin la Seebühne Pfäffikon (Turitg) l’opera Aida da Verdi. Il 2019 ha Danuser fundà il chor d’opera Cantalopera. El è dirigent da l’orchester Rämibühl e dirigent ospitant dals Zürcher Symphoniker. Grazia a sia collavuraziun cun Maestro Nello Santi ha el emprendì d’emprim maun la veglia tradiziun da l’opera taliana. L’onn 2020 ha Claudio Danuser surpiglià l’Opera St. Moritz ch’el maina dapi lura en ina furma nova cun il num Opera Engiadina.

www.claudiodanuser.ch

Sara-Bigna Janett è creschida si en Engiadin’Ota, ma sias ragischs musicalas ha ella a Tschlin. Cun sis onns n’ha ses bab betg pudì franar ses giavisch dad emprender a chantar ed ha finalmain cumenzà a guidar ella e sia vusch. Dapi lura è ella ida cun grond optimissem e bler schlantsch e veglia (e mintgatant era cun damain schlantsch e veglia) la via da chantadura. Il pli impurtant en ses chant è per Sara-Bigna che la musicalitad na cedia betg a la perfecziun. Ella è adina a la tschertga dal dretg equiliber tranter esser en il mument e furmar il tun cun absoluta precisiun. Ella dat in’expressiun ed in tun persunal a blers differents geners da musica e creescha uschia in’interpretaziun autentica. La chanzun rumantscha, quella populara e quella d’art, accumpogna Sara-Bigna dapi sia naschientscha. Sia tgira e cuntinuaziun stattan fitg a cor ad ella. La lingua rumantscha ed il chant furman ina perfetga simbiosa musicala. I resta be da sperar ch’il rumantsch na giaja betg a perder.

www.sarabignajanett.ch

Il «hom dal café» Daniel Badilatti (Sante) ha gia adina gì ina predilecziun per il teater. Saja quai durant il temp da scola obligatoric, durant il gimnasi u pli tard sco commember dal chor per represchentaziuns d’opera ed en il gieu liber 2000 la Svouta.

Il bass-bariton Flurin Caduff è creschì si en il Grischun ed ha studegià tar chant Armin Caduff, pli tard tard tar Hilde Zadek a Vienna e tar Dietmar Grimm a Lucerna. L’onn 2001 ha el retschavì il Premi da promoziun dal chantun Grischun.

Ultra da numerus concerts cun l’ensemble La Compagnia Rossini ha el fatg part da differentas producziuns d’opera da Haldenstein, Opera St. Moritz, Opera Engiadina, Gartenoper Langenthal ed Opera Viva. Suenter engaschaments sco giast è Caduff stà dal 2007 fin il 2016 commember stabel da l’ensemble dal Teater da Lucerna, nua ch’ins ha pudì vesair el tranter auter sco Don Pasquale, Schaunard (La Boheme), Alidoro (La Cenerentola) ed Oroveso (Norma).

Suenter ses engaschament fix è el s’etablì sco chantadur d’opera liber. El ha chantà al Teater da Lucerna, tranter auter sco Bartolo (Barbiere di Siviglia), a l’Opera da Turitg, nua ch’el ha fatg part la stagiun 2021/22 d’ina producziun da Richard Strauss (Salome), e sco giast en diversas producziuns al Teater Bienna Soloturn durant las stagiuns 2024/25/26. Il repertori da Flurin Caduff cumpiglia sper l’opera er oratoris. Per exempel ha el chantà en il KKL Lucerna ed en la Tonhalle Turitg las parts da bass en la Messa da Requiem da Giuseppe Verdi, en la Petite Messe solennelle ed en il Stabat Mater da Gioachino Rossini, en la 9avla sinfonia da Ludwig van Beethoven ed en la Messa ceciliana da Charles Gounod.

Ils concerts quotidians en Engiadin’Ota han ina lunga tradiziun. La stad 2023 ha gì lieu la 113avla stagiun da las matinadas a Puntraschigna. Al cumenzament vegnivan engaschads surtut musicists da la Scala da Milaun, tranter quels er il giuven cellist Arturo Toscanini. Entant ch’ils orchesters da cura, che avevan pli baud per part dimensiuns sinfonicas, èn pli u main svanids, furman ils ensembles da Puntraschigna, San Murezzan e Segl ina veritabla insla da la musica da salun che attira anc oz giasts ed indigens da tut las vegliadetgnas. Senza quests ensembles na pon ins betg pli s’imaginar la cuntrada culturala da l’Engiadina e da la Svizra. Il 1989 ha l’indigen dr. Jürg Frei («il duttur culla flöta») surpiglià l’intendanza da l’orchester da cura da Puntraschigna. En sia èra han ins era midà il num en Camerata da Puntraschigna. Suenter 33 onns ha el surdà la direcziun per il 1. da schaner 2023 a Xaver Fässler. Gia avant che entrar en servetsch sco intendant ha Xaver Fässler – dapi il 1990 clarinettist da la Camerata da Puntraschigna – stgaffì varsaquants arranschaments, lavurà en la biblioteca, creà programs ed introducì novs formats sco Young People’s Concert e Geschichten-Tage (concerts commentads). Cun la collavuraziun cun l’Opera Engiadina fa la Camerata da Puntraschigna in nov pass vers l’avegnir.