Bab, siu archiv ed jeu

Asa Hendry (*1999) è nasch*ida en Val Lumnezia e cresch*ida si en il Grischun. Sias lavurs cumpiglian la litteratura, il teater e la performanza. Hendry ha studegià scienzas da teater e gender studies a Berna e fa il bachelor da scienza da teater applitgada a Giessen (DE). Hendry ha retschavì pliras giadas il premi da litteratura Premi Term Bel a Domat ed è vegni*da undra*da cun il Premi grischun da litteratura per il roman Sin lautget (Chasa Editura Rumantscha, 2018). Asa Hendry viva a Giessen ed en il Grischun.

Rebekka Bangerter (*1991) è ina realisatura da teater e reschissura svizra che viva e lavura a Turitg. Sias lavurs èn vegnidas producidas e represchentadas en Svizra ed a l’exteriur: Gessnerallee Zürich, Roxy Basel, Tuchlaube Aarau, Anhaltisches Theater Dessau, Theater Osnabrück, Dampfzentrale Bern, Monty, Antwerpen, Tajrobeh Festival Teheran, Raum 19, Teatras Menas, LIT e Theater on Screen, Kiew. Il 2017 ha ella survegnì in invit al festival da reschia Körber al Thalia Theater Hamburg. Ella è finalista dal renumà premi svizzer per talents giuvens PREMIO.

Actualmain inscenescha ella al Theater Darmstadt, a la Gessnerallee Zürich ed a la Bühne Aarau. Sper sia lavur per il teater instruescha ella regularmain a la Scola auta turitgaisa dals arts (ZHdK). Rebekka ha studegià reschia da teater a la ZHdK, teater d’objects/medias novas e performanza a l’Universidad nacional de las artes, Buenos Aires, e filologia tudestga, linguistica ed istorgia a Basilea. En pli ha ella fatg il master en il rom dal program da studi DAS Theater ad Amsterdam.

Selina Beghetto (*1989) è creschida si en Engiadina e viva sco dramaturga ed autura a Basilea. Ella ha studegià scienza da teater, film e medias, scienza da saut e germanistica a las universitads da Vienna, Pisa e Berna. Suenter ses studis lavura ella tranter auter sco dramaturga da saut e manadra da producziun per las cumpagnias da saut dal Luzerner Theater e da Konzert und Theater St. Gallen.

Ultra da quai surpiglia ella differents projects d’intermediaziun, p.ex. al VorAlpentheater e per Pro Helvetia, ed è commembra da giurias sco quella dal premi travers zuoz. Actualmain fa ella part da la squadra programmatica da Steps, il festival da saut dal Migros Kulturprozent e lavura vi dad in cudesch biling.

www.selinabeghetto.com

Dominic Röthlisberger (*1993) è cumponist, multiinstrumentalist, producent e scrivachanzuns. Ses mastergn musical ha el emprendì a la Scola auta turitgaisa dals arts, nua ch’el ha studegià cumposiziun per film, teater e medias.

Sco cumponist scriva el la musica per ensembles da differenta grondezza, p.ex. il Trio Archai, ils Singknaben Solothurn e l’Orchestra della Svizzera Italiana (OSI), ed è activ per teaters en la scena da teaters svizra ed a l’exteriur germanofon. Tar sias producziuns las pli recentas tutgan las lavurs per la Gessnerallee Zürich, il Schlachthaustheater Bern ed il TOBS Stadttheater Solothurn. L’onn proxim èn planisads ulteriurs projects en Svizra, en Belgia ed en ils Pajais Bass.

Sco scrivachanzuns sa deditgescha Röthlisberger al project da singer-songwriter Lauber. Ensemen cun Janos Mijnssen (Panda Lux e Faber) ed Alon Ben (Black Sea Dahu) lavura el actualmain vi dad in emprim album. En pli sustegna el autr:as scrivachanzuns sco musicist e producent.

Röthlisberger è confundatur e president dal label sàd Records ch’è vegnì fundà il 2021 per augmentar la visibladad da cumponist:as medial:as e musicist:as.

El è stipendiat da la Hirschmann-Stiftung (2017) ed è vegnì undrà cun il premi da promoziun culturala Azeiger (2019). En il rom da la promoziun da cultura dal chantun da Soloturn ha el dastgà passentar sis mais en in atelier a Paris.

www.dominicroethlisberger.ch

Lukas Sander è naschì e creschì si a Berlin e viva e lavura oz a Turitg. El ha studegià scenografia e design d’exposiziun a la Hochschule für Gestaltung Karlsruhe ed ha fatg il master da scenografia a la Scola auta turitgaisa dals arts. Dapi il 2008 lavura el sco scenograf, designer d’illuminaziun ed artist da video – l’emprim en Germania e dapi il 2008 principalmain en la scena libra da la Svizra.

Differents projects, als quals Sander ha contribuì, èn vegnids mussads en il rom da turneas internaziunalas ed a festivals. En sias atgnas producziuns realisescha el projects specificamain locals, installaziuns e videowalks – l’ultim a la Biennala Berna, en il Palazzo Trevisan a Venezia ed a la Gessnerallee Zürich.

www.lukassander.com

Franca Manz (*1993), viva e lavura a Turitg, sa mova tranter teater ed art, savens en process cooperativs. Ella lavura sco costumista libra e scenografa en differentas constellaziuns per teater, bal e performance en la scena libra svizra.

Franca ha studegià scenografia en il bachelor a la Zürcher Hochschule der Künste ed a la Den Danske Scenekonst Skole a Kopenhagen ed ha terminà in MFA en Public Spheres a l’édhéa a Sierre. En sia pratica artistica s’occupa ella dal svanir e perscrutescha il dialog cun il lieu, cun l’aura e cun las casualitads.

Il 2022 ha Franca survegnì il stipendi da lavur da Covid da la citad da Turitg, ella è stada en ina residenza da Pro Helvetia sper Campo a Gent, en l’emissiun d’emballadi Glaruna ed en la Sasso Residence (2023).

www.francamanz.ch

Riikka Läser ha asolvì sia scolaziun da saut a Turitg ed a la scola da ballet dal Ballet da Hamburg John Neumeier. Durant quest temp ha ella retschavì trais giadas ina suenter l’autra il stipendi da Migros. Dal 1998 fin il 2005 è ella stada engaschada sco solista tar il Tanztheater Nürnberg, nua ch’ella ha lavurà cun numerus:as coreograf:as e reschissur:as renumad:as al nivel internaziunal. Dapi il 2005 lavura ella sco sautunza e coreografa libra ed è gia stada giast tranter auter al Aldenburgh Music Festival, als Bregenzer Festspiele, a la Canadian Opera Company, al Bridging Arts Salzburg/Nürnberg sco er en la regiun, numnadamain a l’Origen Festival Cultural ed al Ressort K. Dapi plirs onns vegnan vitier pli e pli atgnas lavurs da reschia, p.ex. l’opera da Benjamin Britten Noahs Flut per il Bridging Arts Salzburg (undrada il 2016 cun il Salzburger Landespreis für kulturelle Bildung), la miniatura da saut Deux Femmes per l’Origen Festival Cultural u Bedford Suite per il Zuoz Globe. Il 2022 ha ella fundà ensemen cun Ivo Bärtsch sia atgna cumpagnia LÄSER & BÄRTSCH Tanz Theater ed ha preschentà il november 2022 cun BEASTS – Blue Hour at Macbeth’s l’emprima atgna producziun che ha survegnì grond laud da la critica e dal public.

Lorenzo Polin (*1985) a Samedan, Svizra, è in actur, reschissur e promotur da cultura multifar. Suenter la matura a l’Academia Engiadina ha el absolvì ina scolaziun d’actur a la European Film Actor School a Turitg (2006-2009). Polin è sa fatg in num grazia a sias numerusas rollas da teater e film. El è enconuschent era sco reschissur e sviluppader da concepts. Polin ha fundà l’uniun DRAUFF che promova projects culturals ed el s’engascha spezialmain per la promoziun da talents giuvens en curs per actur:as e lavuratoris d’improvisaziun. Ses projects da teater èn colliads stretgamain cun sia patria grischuna, nua ch’el gioga savens rollas en tocs rumantschs. Tar sias producziuns pli enconuschentas tutgan La barunessa, Tres 100 portas, Tredeschin Retg e Giacumbert Nau. Sia lavur cumpiglia era projects culturals sco l’organisaziun da la tribuna da naiv IMPULS a Samedan.

Ultra da ses engaschament sco actur moderescha Polin differentas occurrenzas ed accumpogna prelecziuns, p.ex. Mord im Val Fex ensemen cun Andrea Gutgsell, ses autur cumpogn, ubain en il rom da l’omagi a Vico Torriani ensemen cun Sämy Zünd. Per sias contribuziuns culturalas è Polin vegnì undrà cun plirs premis, tranter auter il Premi da cultura da la regiun Malögia 2021 ed en il rom da la concurrenza per promover la lavur culturala professiunala dal chantun Grischun 2020. Lorenzo Polin è in artist profundamain attaschà a sia regiun ed inspirà da sias ragischs e da la cultura engiadinaisa.

Lorin Könz (*2009) gioga regularmain rollas per la Shakespeare Compagny dal Teater Lyceum Zuoz. Bab, sieu archiv ed jeu è sia emprima producziun da teater professiunala.

Bistgaun Capaul da la Lumnezia fa dapi decennis teater sco actur laic, da nov cun l’Uniun da teater Cuschnaus.